نيويورك وفـــــاضي , , , نيويورك وفـــــاضي

نيويورك وفـــــاضي . . . نيويورك وفـــــاضي

 *= لوكاس

**= أنا

***= يمني

****=فتاة البطاطس

الطبيعي إنك تحب مكان عشان هو جميل وعشان الناس اللي عايشين فيه بيخلوك تحبهم وتحب المكان ده أكتر كمان

لكن تبقي عايش في مكان بتحبه عشان المكان نفسه وفي نفس الوقت مش حابب إنك موجود في المكان ده وسط الناس اللي عايشين فيه؟

مصر

اليوم الأول"نص كيس قلبظ"

كنت لسه صاحي من النوم,,,المفروض إني أوصل الكلية مش بعد الساعة تسعة عشان عندي محاضرة الساعة تسعة ونص

وحسيت أجمل إحساس وأنا ماشي لوحدي في الشبورة اللي لسه ماختفتش وحاسس إن مفيش أي حد ماشي جنبي وإن الشارع فاضي وكأن الدنيا كلها بتاعتي ومحدش مشاركني فيها


وصلت الموقف مستني عربية توديني طنطا...وللي مش عارفين في منطقة طنطا,في منطقتين مختلفتين بتروحلهم العربيات بتاعة طنطا

موقف الجملة,,,وموقف الجلاء

ومفيش أكتر من العربيات اللي بتبقي رايحة موقف الجلاء لكن قليل أوي لما تلاقي عربية جاية من مصر مثلا ورايحة موقف الجملة

واليوم ده كنت رايح الموقف بدري ولسه مفيش زحمة كتير في الموقف اللي بيبقي عادة مليان بشر رايحين موقف الجملة,,,بشر من جميع الأشكال والثقافات

واقف مستني وفي الخلفية صوت سواق عربية رايحة موقف الجلاء,,,الجلاء وفاضي جلاء جلاء جلاااااء

جت في دماغي فكرة غريبة

 

واحد أمريكي إيديه مليانين شحم ولونهم أسود وماسك خلقة"حتة قماش قديمة"وبيشاور علي اللي رايح واللي جاي وبينادي عليهم,"نيويورك يا باشا؟نيويورك يا بيه؟نيويورك وفاضي نيويورك وفاضي نيويوووووورك" ومفيش ناس كتير بيركبوا معاه

يقعد وقت كتير علي ما العربية تبدأ تحمل ركاب و....

كنت لسه بفكر لغاية ما لقيت عربية رايحة موقف الجملة وأنا فوتها عشان كنت سرحان,,,ولسه عربية الجلاء بتحمل ولسه مفيش ناس كتير بيركبوا والراجل لسه عمال ينادي


بصيت في الساعة لقيتها  تمانية إلا خمسة والموقف بدأ يتملي ناس,,,الظاهر إني قعدت أتخيل مع نفسي كتير لحد مانسيت إني مرتبط بميعاد في الكلية مع ....

الجملة الجملة الجملة,,,اللي رايح طنطا الجملة,,,تباع عربية جاية من مصر بينادي علي اللي رايح في طريق موقف الجملة

مالقيتش نفسي,,,الموقف اتزحم أكتر وأكتر وفي شباب يظهر عندهم جيش في طنطا اتزاحموا علي العربية وماعرفتش أركب

مارضيتش أبص في الساعة عشان ماتوترش أكتر من كده

سمعت واحد جنبي بيقول لزميله,"إنت بس إرمي نفسك عند باب أي عربية جاية والناس هي اللي هتزقك جوا العربية من غير ماتتعب نفسك.",,,قلت أنا ماقداميش غير إني أعمل كده فعلا واللي يحصل يحصل بقي

أنا كده كده رفيع ومش ممكن أتبطط أكتر من كده


عشان أنا أرفع من كده


استنيت واستنيت لغاية مالقيت عربية جاية من بعيد,,,ولسه سامع في الخلفية واحد بيقول,"واحد جلاء واحد جلاء.",,,وانا لسه باصص في الناحية اللي جاية منها العربية اللي كلنا بنتمني انها تكون رايحة موقف الجملة في طنطا


وقف الصوت اللي في الخلفية,,,وصلت العربية وللأسف مالحقتش أحط نفسي قدام باب العربية عشان الناس تزقني جوا العربية...اتوترت أكتر

بصيت الناحية التانية لقيت عربية الجلاء مشيت وفي واحد كده نازل من عربية الجملة اللي لسه كانت ماشية,,,

اتسرق

كان عارف حكاية إنه يحط نفسه قدام الباب والناس تزقه جوا...بدل مايزقوه,سرقوه

قعد يعيط بقي وأنا حسيت بالملل والقرف من الشباب اللي عندهم جيش دول عشان أكيد واحد منهم هو اللي سرق الراجل الغلبان ده لأسباب كتيرة منها إنهم مش بيهمهم حد وعاملين بالضبط زي عساكر الأفلام العربي اللي جايين من"بلاد الفلاحين"...قلت أبص في الساعة عشان لو لقيتني اتأخرت أوي,أروح في عربية الجلاء وأبقي أركب مواصلة تانية توديني الجملة في وسط الطريق

الساعة بقت تمانية ونص,,,واتضح إن صوت سواقين الجلاء اختفي عشان العربيات اللي رايحة الجلاء خلصت خلاص ومفيش ولا عربية رايحة الجلاء ومفيش ولا عربية رايحة الجملة


قلت خلاص بقي ماعنديش غير إني أقعد أسرح مع نفسي تاني عشان كده كده خربانة,,,مع إني المفروض أروح بالكتير علي الساعة تسعة عشان هقابلها النهاردة...يللا بقي مش مهم

*تقابل مين يا برنس الليالي؟

**مين؟لوكاس؟حبيب قلبي,,,أبدا مفيش أصلي كنت عامل حوار كده بس مش عاوز أصدع دماغك بيه

ضحك وقالي,"إن ماكنتش إنت تصدعلي دماغي,مين هيصدعهالي؟"...ضحكت أنا كمان وحكيتله علي الحوار

....قبلها بسنة

**يمني؟إنتي مش بتردي علي الإيميلات اللي ببعتهالك ليه؟إنتي زعلانة من حاجة؟علي العموم أنا ألفت قصيدة كده,ياريت تعجبك

شمس عليها تحية وسلام**خلعت عليها جمالها الأيام

هي علي الطريق رسمته بخيالي**أمهد لها إلي قلبي السبيلا

فلعلها تشعر بلهيب العشق فاطنة**فتري القلب حائما فرحا

هي وردة يصدح لها الهوي غزلا**وانا القادم ولسان الهوي حالي

أاهوي التي أهوي لها البدر ساجدا**ألست تري الحسن في وجهها؟

وريحها أطيب من طيبها**والطيب يحوي المسك والعنبرا

إذا لم تشاهد غير حسن شياتها**فالحسن عن ناظريك مغيب

فكأنها مطلع الشمس أرقبها**فإذا طلعت دق القلب لها مجترئا

حدثتها عن العوالي من الحب ولياليه**فإذا بها تنسي الأحاديثا

ما العيب في ولا قصر القلب هاويا**ولكنها تبيدني بلقب الأخ لها

عشقتها في الحلم ولامني أصحابي**وكوكب العشق بكي لحالي

فلعلها تكف عن قتلي غائبة**وتشعر بالقلب الخفاق حالما

**ياريت تردي عليا عشان أنا بجد مش فاهم ليه بقالك فترة مش بتردي عليا,,,سلام

...بعدها بيوم

***محمد,,,أنا وصلني الإيميل بتاعك

***إنت بتحبني؟

**يمني,,,إحنا ماشفناش بعض وكل كلامنا في حدود النت سواء كتابة أو سماع صوت بعض...لكن إنتي إنسانة رقيقة وفيكي صفات كتير حلوة جدا

...ولسه هكمل

***أيوة بس انا أكبر منك يا محمد...إزاي باباك هيوافق إن إحنا نتجوز؟

*يمني,,,أنا هقنع بابا بأي حاجة طالما انا مقتنع إنها صح!!!

وخلص الحوار كده بطريقة كلاسيكي عبيطة

...من ساعتها ماكلمتنيش ولو حتي علي إننا أصحاب

**عندها حق,,,واحد باعتلها قصيدة عبيطة عن الحب يبقي هتفهمه إزاي؟وبعدين دي قصيدة دي؟إلا مافيها بيت موزون علي اللي قبله

**هي صحيح من تأليفي والمفروض إني أعتز بيها,بس أنا إزاي عقلي طاوعني أعمل الخطيئة دي؟دي عار علي الشعر العربي

*ياراجل بس ماتقولش كده...هي عاجباني ومالكش إنت دعوة
*كمل يا حبيب قلبي الحكاية

**الله يكرم أصلك,,,أنا حبيت كذا واحدة من وانا صغير وكان دايما الحب من طرف واحد وكنت دايما أسرح مع نفسي في الحب ده وأتخيل إن الطرف التاني بيبادلني نفس الشعور وكنت ساعات أوصل لدرجة إني بحس بسعادة رهيبة وبعدها علي طول بنزل من القمة لقاع القاع ولا هبدة البورصة المصرية في أيامها السودا

**لغاية ماقررت بيني وبين نفسي إني ماحبش تاني,,,وفعلا عملت كده

**بس مفيش شهر بعد موضوع يمني ده وعرفت بنت تانية أكبر مني برده بس المرة دي هي اللي كانت بتحبني وعرفت ده من نظرات عنيها ليا أول مرة شفتها فيها

**وعلي الرغم من إن موضوع يمني كان مجرد إعجاب بس أنا قلتلها بحبك,,,وعلي الرغم من إنه حاجة فاشلة عشان لا انا ولا هي شفنا بعض لكن ده مايمنعش إن الشكل مش كل حاجة

**لكن القدر كان بيثبتلي إني كنت غلط,,,أديني لقيت واحدة بتحبني

**شايفها وشايفاني

**وانا لسه قايل مش مهم الشكل

**ومفيهاش أي صفة وحشة

**أعمل إيه؟أجرحها وأقولها إني مش بحبها؟

**لأ,,,لايمكن أعمل كده

**قلتلها إني معجب بيها,,,قالتلي وأنا كمان

**بس مع الوقت حسيت إني مش هقدر أدي في الحب ده

*وهو الحب إيه غير عطاء يا صاحبي؟

**أديك  قلتها

**أنا رحت حاكيلها عن قصتي مع يمني وقلتلها إني لسه متعلق بحبها ولغاية مانرجع نكلم بعض هفضل متعلق بيها واني مش هحب ولا اي واحدة تانية بإخلاص لغاية مايموت حب يمني جوا قلبي

**قالتلي انا متفهمة كويس ولو تحب أكلمهالك أنا معنديش مانع

**بجد يا لوكاس,,,أد إيه حسيت إني ولا حاجة ساعتها

**خلصت حكايتي معاها وبقيت أندم إني ماقلتلهاش من الأول إني مش هقدر أحبها بدل ما أدخلها في متاهة معايا طالما أنا مش أد المسؤولية...صحيح أنا وهي لسه أصحاب لحد دلوقتي بس زي ما أنيس منصور ما بيقول إن الصداقة ممكن تتحول لحب لكن لا يمكن يتحول الحب لصداقة

*أمال مين اللي كنت هتقابلها النهاردة دي؟

فجأة عربية رايحة موقف الجملة وصلت واطمنت علي محفظتي وموبايلي وكل حاجتي ورحت حاطط نفسي قدام باب العربية وركبت

الساعة كانت تسعة بالضبط ساعتها والسواق ماشاء الله عليه ماشي علي سبعين

وبعد ماعدي أول كوبري,,,بقي ماشي علي ستين ومازودش عن كده لغاية ماوصلت للمكان اللي بنزل فيه"كفر عصام"قبل موقف الجملة بشوية صغيرين كده


بس يا خسارة لوكاس مش متعود علي جو الزحمة ده وماعرفش يركب معايا...يمكن النهاردة أنا اللي اتكلمت معاه أكتر ماتكلم هو,بس في الغالب بحس بالراحة لما بسمع منه...يللا,تتعوض مرة تانية


المهم وصلت الكلية متأخر


واقف مع واحد صاحبي وهو بيدفع مصاريف السنة دي في الكلية بتاعتنا"طب أسنان"وفجأة لقيته عمال يضحك ويقولي بص بص علي البتاعة دي كده,,,

...ورقة المصاريف...

الحكومة الله يكرمها ويخليهالنا عاملالنا ورقة المصاريف فيها تفصيل عن كل قرش من المصاريف اللي بندفعها رايح فين

لو الصورة مش واضحة,,,أقولكم علي الدرر اللي فيها


كل قسم إداري في الكلية له نصيب من المصاريف اللي بندفعها

بالذات إدارة شؤون الطلاب نصيبهم 20 جنيه من أصل 160.5 جنيه


دعم وصيانة المدرجات والمعامل اللي يادوب بتقضي سكشن واحد"مجموعة واحدة"بالعافية...نصيبها 75جنيه


صندوق رعاية النشء والشباب والرياضة اللي مانعرفش عنه حاجة في كليتنا أساسا نصيبه 15 جنيه


رسم تأمين ضد الحوادث,,,25 قرش

يعني تمن كيس قلبظ,,,قلبظ إيه؟ده حتي قلبط غلي وبقي بخمسين قرش

يعني كيس القلبظ يفصل مني روحين !!!



بعيدا عن التريأة والسخرية اللي أبدعت فيها أنا وصاحبي ده يومها,,,أنا من جوايا زعلان

مش عشان الربع جنيه

مش عشان مخروم

مش عشان المية وستين جنيه ونص بتوع المصاريف



زعلان عشان حسيت إني ولا حاجة

أد إيه بحس بالعظمة وانا مع نفسي,,,أد إيه بحس إن محدش أدي وأنا قلمي في إيديا وبكتب اللي جوايا

وأد إيه برده بحس بالحقارة وأنا وسط ناس مش بيقدروا أعظم كائن علي وجه الأرض دي,,,البني آدم



للمرة التانية,,,أنا سعيد إن أنا مصري وسعيد إني موجود علي أرض مصر

بس مش سعيد إني موجود بين مصريين,,,بين قوسين مش بيقدروا حد

اليوم الثاني"حب فاقع"

النهاردة قابلت لوكاس تاني

وكملت حكاية يمني بتاعة اليوم الأول

*قابلتها إمبارح يا بشر ولا؟


**هقولك

**أنا دايما أسمع علماء النفس بيقولوا إن الواحد لو أقنع نفسه بحاجة فعلا,,,ممكن تتحقق

**ودي قاعدة مهمة جدا لو عاوز تغير من نفسك أو تغير من أي حد تاني,,,وكل ما زادت قوة الإقتناع زادت سرعة وقوة الاستجابة

**يعني لو أقنعت نفسك إنك ممكن تطلع من الأوائل مثلا,,,هتلاقي نفسك بتذاكر أكتر وعاوز تحقق الحلم ده أكتر من لو كان مجرد تمني

**من ناحية تانية,لو انت فضلت خايف طول السنة إنك لا قدر الله ممكن مانجحش وفضلت الفكرة دي ملازماك طول السنة,,,هتتحقق

**فأنا طول السنة اللي فاتت كنت بتخيل مع نفسي إن يمني هترجع تكلمني تاني,,,مع إن أي حد ممكن يقول إنها قالت عليا"مين الأهبل ده؟"وبالتالي لايمكن ترجع تكلمني تاني

**بس فعلا كلمتني تاني

**بس اللي ماتخيلتهوش طول السنة اللي فاتت...هي هترجع تكلمني تقولي إيه

**قالتلي,"خلينا أصحاب وبس"...براعة في التثبيت

**مش مهم أنا قلتلها إيه

**اللي حصل بعد كده هو الأهم

**أنا ليا أصحاب كتير,منهم اللي عنده حبيبته ومنهم اللي زيي كده جرب مرة أو مرتين وفشل

**فأنا قلت لنفسي أعمل نفس الخدعة اللي استمرت طول السنة اللي فاتت,,,قلت لكل أصحابي إني خلاص بقي ليا واحدة بحبها وبتحبني

**وأقنعت نفسي بكده,,,بس واحد من أصحابي فاجئني وقالي,"إحكيلي يا برنس حبيتها إزاي؟",,,سؤال نزل عليا زي الصاعقة

**قعدت أرتجل قصة حب مصطنعة بيني وبين,,,مش عارف أقول مين

**أقرب واحدة كنت بكلمها هي يمني,,,فارتجلت قصة حب بيني وبينها الاسكندرانية

.....
أيوووه علي كلمة أيوووه وهي طالعة من بؤها يا صاحبي...أنا من سنتين كنت في المصيف في إسكندرية وكنت بشوف نتيجة الثانوية العامة هناك

كنت لسه في تانية ثانوي وهي كمان كانت في تانية ثانوي,,,بس ماكناش لسه عرفنا بعض

واقف قدام السايبر مستني النتيجة,,,ووقعت عينيا علي واحدة زي القمر

فضلنا باصين لبعض لغاية ما سمعت زغرودة أمي وقالتلي مبروك يا حبيبي إنت جبت 204.5 من 205

وقعدت تحضني لغاية ما غابت البنت الجميلة عن أنظاري,,,لغاية ماتعرفت علي واحدة اسمها يمني من علي الإنترنت وعرفت انها من نفس المنطقة اللي بصيف فيها كل سنة واتأكدت من صحة كلامها وفرحت جدا

لغاية ماحسيت إني كنت أعرفها من زمان,,,سمعنا صوت بعض ورحت سألتها هي جابت نتيجة الثانوية العامة بتاعتها في سنة تانية ثانوي منين

وطلع إنها هي هي البنت الجميلة اللي شفتها هناك...فقلتلها بحبك,,,وإن شاء الله هنتقابل أنا وهي قريب في طنطا أو أروحلها إسكندرية
.....

**دي كانت القصة المصطنعة اللي ارتجلتها قدام صاحبي اللي فاجئني بسؤاله ده...صدقني وأنا كمان صدقت نفسي وعشت علي أمل إني ألاقي حب زي ده

**يللا,,,هعتبرها كدبة إبريل


*يعني هي دي اللي انت كنت بتتخيل إنك تقابلها إمبارح...تخيل يعني؟


**أيوة


*بص يا بشر...ماتستعجلش حب مش المفروض إنه ييجي دلوقتي,وماترضاش بحب فرضته عليك ظروف

*مش عيب إنك تستني علي ماتحب وتتحب,لكن العيب إنك تحب إنسان غلط في الوقت الغلط وترفض إنسان صح حبك في الوقت الصح


**عندك حق,,,عندك حق

اليوم التالت"إنت معقد آخر حاجة"
 

أنا متعود إني مش بتكلم كتير

مش بحب أتكلم زي مابحب أكتب مثلا,,,لذلك لو أي حد عنده خبره في البنات بتوع اليومين دول هتلاقيه عارف إن أي بنت دلوقتي بتحب تعرف ولد كول وبيعرف يتكلم في كل الحاجة بداية من البطاطس لحد ملف إيران النووي...وواحد زيي مثلا بنضارته بمبادئه بفكره بمقالاته بسلطاته ببابا غنوجه ده صورته موجودة في معجم الوسيط صفحة 199 فوق علي اليمين في مادة"ع ق د" مثال توضيحي لمعني كلمة التعقيد والكآبة

 

كنت بتكلم مع واحدة زميلتي في الدراسة وكده وبعدين فجأة لقيتها بتقولي,,,إنت معقد

أنا استقبلت الكلمة واتربيت,,,يعني اتخضيت ومابقيتش عارف أرد

قلت لنفسي,,,عندها حق

أنا معقد آخر حاجة كمان

حد يكلم بنوتة في الدراسة والغم ده؟

جيت بعدها بكام يوم ودار بيننا الحوار ده

**هاي إزيك عاملة إيه؟


****تمام الحمد لله,,,يو؟


**أنا كويس الحمد لله


**بقولك,,,إيه رأيك نتكلم في البطاطس؟


****شور,,,وماله يللا...بتحبها محمرة؟


**آه,,,ومسلوقة بالزبدة برده


****آه جميلة أوي


**مممم,,,إيه تاني في البطاطس؟


****صينية,,,بتبقي تحفة


**آه فكرتيني أنا بحبها أوي

****بس كده يتهيألي مفيش حاجة تاني ممكن نتكلم عنها في البطاطس...إيه رأيك في البطيخ؟


**آه أنا بحبه مع الجبنة بيبقي هايل


****وأنا كمان,,,بيبقي مسكر أوي ولذيذ


**الكوسة؟؟


****الله,,,بحبها جدا جدا جدا

بيقولك لو نهر النيل كان صلصة ماكانش كفي الكوسة اللي في مصر... وعجبي

والحوار استمر علي كده وساعتها حبت الكلام وماقالتليش إني معقد ولا حاجة,,,في بنات تانيين بحب إني أتكلم معاهم عشان بحس إنهم عاقلين عن كده وموجودين كتير وبتشرف إني أعرف بنات زيهم

.....
جتلي فكرة سواق نيويورك ده تاني

وقلت لنفسي,,,"هو ليه مستحيل حاجة زي دي تحصل؟فين الغلط؟" يمكن في اليوم الأول الفكرة جتلي عشان شفت السواقين المصريين اللي بيتعبوا دول وصعبوا عليا,لكن في اليوم التاني حسيت إننا نستاهل عشان في ناس مش بيقدرونا,أما في اليوم التالت فأنا حسيت إن الفكرة كانت معقدة أكتر من اللازم,,,يمكن

بس ليه مانفكرش إن ظاهرة الزحام دي مثلا تتلاشي من عندنا بدل مانا فكرت إنها تكون موجودة بالشكل المصري الخاص ده في أمريكا مثلا؟

أكيد هنبقي أحسن,,,بس ده مش ممكن يحصل وإحنا بنضحك علي بعض,وإحنا مش بنقدر بعض

لازم كل واحد يحمد ربنا إنه موجود في البلد دي,البلد دي بالذات...ويتأكد إن أكيد في حكمة إن ربنا أوجده هنا مش في أي حتة تانية غير هنا...ولازم نبدأ نحترم بعض ونقدر دور كل واحد فينا في المجتمع ده
من أول عامل النظافة اللي من غيره مانقدرش نعيش لحد أكبر واحد بيحافظ علي حياتنا في البلد دي
.....

Muhammad Mag-D Bishr

Download the full featured article @http://www.mediafire.com/?dmwdznmmroy